ဟားမတ်စ်အဖွဲ့ဟာ ဇူလိုင် ၄ ရက်က ဂါဇာ အပစ်ရပ်အဆိုပြုချက်အပေါ် အပြုသဘောဆောင် စိတ်ဓာတ်နဲ့ ညီရင်းအစ်ကိုလို တုံ့ပြန်ခဲ့ကြောင်း ပြောကြားခဲ့ပြီး ပဋိပက္ခ အဆုံးသတ်ရေးအတွက် ဓားစာခံတွေလွတ်မြောက်ရေးနဲ့ ညှိနှိုင်းဖို့ မျှော်မှန်းထားတဲ့ အပေးအယူကို အကောင်အထည်ဖော်ရေး ဆွေးနွေးဖို့ ပြင်ဆင်ထားတယ်လို့ လည်း ဆိုပါတယ်။ 

အမေရိကန်သမ္မတ ဒေါ်နယ်ထရမ့်ပ်က အစ္စရေးနဲ့ ဟားမတ်စ်တို့ကြား ၂၁ လနီးပါးကြာ စစ်ပွဲအတွင်း ရက်ပေါင်း ၆၀ ကြာ အပစ်အခတ်ရပ်စဲရေးအတွက် နောက်ဆုံး အဆိုပြုချက်ကို အစောပိုင်းမှာ ကြေညာခဲ့ပြီး လာမယ့်နာရီပိုင်းအတွင်း အဖွဲ့တွေဆီမှ အကြောင်းပြန်မယ်လို့ မျှော်လင့်ထားကြောင်း ပြောပါတယ်။

ဟားမတ်စ်အဖွဲ့ဟာ ဂါဇာကမ်းမြောင်ဒေသရှိ ပါလက်စတိုင်း ပြည်သူတွေအပေါ် ရန်လိုမှုရပ်တန့်ဖို့ စေ့စပ်ညှိနှိုင်းသူတွေရဲ့ နောက်ဆုံးအဆိုပြုချက်နဲ့စပ်လျဉ်းပြီး သူ့ရဲ့ပြည်တွင်းရေးညှိနှိုင်းမှုအဖွဲ့တွေ အပြင် ပါလက်စတိုင်းအဖွဲ့ခွဲတွေ၊ တပ်ဖွဲ့တွေနဲ့လည်း ဆွေးနွေးမှုတွေ လုပ်ပြီးသွားပါပြီ လို့ ဟားမတ်စ်ရဲ့ တရားဝင်ဝက်ဘ်ဆိုက်မှာ ရေးသားခဲ့ပါတယ်။

နှစ်ဖက်စလုံးအတွက် စိန်ခေါ်မှုတွေ ဆက်ရှိနေနိုင်ကြောင်းကို ညွှန်ပြတဲ့ လက္ခဏာတခုအနေနဲ့ လူသားချင်း စာနာထောက်ထားမှုဆိုင်ရာ အကူအညီများ၊ ရာဖာနယ်စပ်ဖြတ်ကျော်ဂိတ်ကနေ အီဂျစ်နိုင်ငံကို သွားရာလမ်းကြောင်းနဲ့ အစ္စရေးတပ်တွေ ဆုတ်ခွာမယ့် အချိန်ဇယားနဲ့ ပတ်သက်ပြီး ရှင်းလင်းမှုတွေအပေါ် စိုးရိမ်မှုတွေ ရှိနေဆဲဖြစ်တယ်လို့ ဟားမတ်စ်နဲ့ မဟာမိတ် စစ်သွေးကြွအဖွဲ့ရဲ့ ပါလက်စတိုင်း အရာရှိ တဦးက ပြောပါတယ်။ 

အမေရိကန်သမ္မတ ထရမ့်ပ်က အစ္စရေးဟာ ရက်ပေါင်း ၆၀ ကြာ အပစ်အခတ်ရပ်စဲရေးကို အဆုံးသတ်ဖို့ လိုအပ်တဲ့အခြေအနေတွေကို သဘောတူခဲ့ပြီး အဲဒီကာလအတွင်းမှာ ပါလက်စတိုင်း နယ်မြေအတွင်း အမေရိကန် မဟာမိတ်ရဲ့ စစ်ပွဲကို အဆုံးသတ်ဖို့ ကြိုးပမ်းဆောင်ရွက်သွားမယ်လို့ အင်္ဂါနေ့က ပြောဆိုခဲ့ပါတယ်။ 

အစ္စရေးဝန်ကြီးချုပ် ဘန်ဂျမင် နေတန်ယာဟုက ထရမ့်ပ်ရဲ့ ကြေညာချက်နဲ့ပတ်သက်လို့ မှတ်ချက် မပေးသေးဘဲ သူတို့ရဲ့ လူသိရှင်ကြားထုတ်ပြန်ချက်တွေမှာ နှစ်ဖက်စလုံးက ဝေးကွာနေဆဲ ဖြစ်ပါတယ်။ 

နေတန်ယာဟုက ဟားမတ်စ်တွေကို လက်နက်ချရမယ်လို့ အခါခါ ပြောဆိုခဲ့ပြီး အသက်ရှင်နေသေးတဲ့ ဓားစာခံ အယောက် ၂၀ ကို ချုပ်နှောင်ထားတယ်လို့ ယူဆရတဲ့ ဟားမတ်စ် စစ်သွေးကြွအဖွဲ့ကလည်း ဆွေးနွေးဖို့ကို အခုအချိန်အထိ ငြင်းဆိုထားတာပါ။ နေတန်ယာဟု ဟာ တနင်္လာနေ့မှာ ဝါရှင်တန်မှာ ထရမ့်ပ် နဲ့ တွေ့ဆုံဖို့ စီစဉ်ထားပါတယ်။

Source:Reuters