ရှမ်းပြည်နယ်၊ လင်းခေးမြို့နဲ့ စစ်ကိုင်းတိုင်း ဟုမ္မလင်းမြို့နားမှာ အင်အားရစ်ချ်တာစကေး ၄ ကျော်တဲ့ ငလျင်လှုပ်ခတ်ခဲ့တယ်လို့ အမျိုးသားညီညွတ်ရေးအစိုးရ (NUG) ရဲ့ လူသားချင်းစာနာထောက်ထားရေးနဲ့ ဘေးအန္တရာယ်ဆိုင်ရာ ဝန်ကြီးဌာနက ထုတ်ပြန်ပါတယ်။
ဇူလိုင် ၁ ရက် ဒီမနက်အစော ၂ နာရီ ၁၃ မိနစ်လောက် ရှမ်းပြည်နယ်၊ တောင်ကြီးမြို့ရဲ့ အရှေ့တောင်ဘက် ၁၁၈ ကီလိုမီတာအကွာ၊ လင်းခေးမြို့နာ မြေအောက်အနက် ၁၀ ကီလိုမီတာကိုဗဟိုပြုပြီး ရစ်ချ်တာစကေး ၄ ဒသမ ၂ အဆင့် ငလျင်လှုပ်ခဲ့တယ်လို့ ဆိုပါတယ်။
ဒီမနက် ၉ နာရီ ၁၄ မိနစ်အချိန်ကလည်း စစ်ကိုင်းတိုင်း၊ ဟုမ္မလင်းမြို့အနီး၊ မြေအောက်အနက် ၁၃၅ ကီလိုမီတာကိုဗဟိုပြုပြီး ရစ်ချ်တာစကေး ၄ ဒသမ ၂ အဆင့် ငလျင်လှုပ်ခဲ့ပြီး မြေငလျင်တိုင်းတာစက်တွေနဲ့ ဗဟိုချက်ရဲ့အနီးအဝေးပေါ်မူတည်ပြီးတော့ ငလျင်အင်အားပမာဏ နည်းနည်းကွာနိုင်တယ်လို့လည်း ဆိုပါတယ်။
မိုးလေဝသဌာနကတော့ လင်းခေးမြို့နားမှာ အင်အား ရစ်ချ်တာစကေး ၄ ဒသမ ၁ အဆင့်ရှိတဲ့ငလျင်လှုပ်ခတ်ခဲ့တယ်လို့ပဲ ထုတ်ပြန်ထားပြီး ဟုမ္မလင်းမြို့နား လှုပ်ခဲ့တဲ့ငလျင်ကိုတော့ ထုတ်ပြန်ထားတာမရှိပါဘူး။
