ရှမ်းမြောက်မှာ နယ်မြေအငြင်းပွားနေတဲ့ ရှမ်းပြည်တိုးတက်ရေးပါတီ (SSPP) နဲ့ ကိုးကန့်တပ် (MNDAA) တို့ ဒီနေ့ ဇွန် ၁၇ ရက် မနက်ကစပြီး ထပ်မံဆွေးနွေးနေကြတယ်လို့ SSPP စစ်ရေးသတင်းအရင်းအမြစ်ဆီက သိရပါတယ်။
SSPP စစ်ရေးသတင်းအရင်းအမြစ်က “နှစ်ဖက်လုံးက ဖုန်းတွေနဲ့ အရင်ဆုံးစကားပြောဖြစ်ကြတယ်။ အဲဒါနဲ့ MNDAA က အစည်းအဝေးကို SSPP ဌာနချုပ် ဝမ်ဟိုင်းမှာလုပ်ဖို့ ပြောတာပေါ့။ ဒါပေမဲ့ SSPP ဘက်က လက်မခံလို့ ဒီသံလွင်တရုတ်ရွာမှာ ဆွေးနွေးပွဲဖြစ်တာ။ အခုညနေအထိတော့ အဖြေမထွက်သေးဘူး။ ဆွေးနွေးနေတုန်း” လို့ DVB ကို ပြောပါတယ်။
အဲဒီအစည်းအဝေးကို SSPP ဘက်က ကားအစည်းရေ ၅၀ လောက်နဲ့လာရောက်ကြပြီး MNDAA ဘက်ကလည်း အများအပြားလာရောက်ကြတယ်လို့ MNDAA သတင်းအရင်းအမြစ်က DVB ကို အတည်ပြုပါတယ်။
“ဘာတွေဆွေးနွေးတယ်ဆိုတာကိုတော့ ပြောပြလို့မရသေးဘူး။ အဓိကတော့ နယ်မြေပိုင်းခြားရေးကိစ္စတွေကိုပဲ ဦးတည်ဆွေးနွေးဖြစ်တာ။ အခုထိတော့ မပြီးသေးဘူး။”
ပြီးခဲ့တဲ့ ဧပြီ ၂၈ ရက် ညနေပိုင်းက MNDAA ကိုးကန့်တပ်တွေဟာ သီပေါမြို့နယ် နမ့်မကျေးရွာကို ဝင်ရောက်လာတာကနေ SSPP တပ်တွေနဲ့ စကားအချေအတင် ဖြစ်ကြပြီးနောက် ဧပြီ ၂၉ မနက်ပိုင်းမှာ ပစ်ခတ်မှုတွေ ဖြစ်ပွားခဲ့ပါတယ်။
နယ်မြေအငြင်းပွားမှုတွေကြောင့် ပစ်ခတ်မှုတွေဖြစ်ခဲ့တဲ့ SSPP နဲ့ MNDAA တပ်တွေဟာ ပထမအကြိမ်တွေ့ဆုံဆွေးနွေးမှုကို UWSA ဌာနချုပ် ပန်ဆိုင်းမှာ လုပ်ခဲ့ကြပေမဲ့ အဆင်မပြေခဲ့ကြဘူးလို့ သိရပါတယ်။
