ဥရောပတိုက်မှာ အပူဆုံးတနိုင်ငံလို့ ရှုမြင်ထားတဲ့ ပိုလန်နိုင်ငံရဲ့ ကမ်းရိုးတန်းမှာ နေထိုင်သူတွေနဲ့ ဧည့်သည်တွေဟာ အချိန်ရာသီနဲ့ မလိုက်အောင် ပူနွေးမှုကို ခံစားခဲ့ကြရတယ်လို့ မိုးလေဝသပညာရှင်တွေက ပြောပါတယ်။

ကမ်းခြေကမ်းရိုးတန်းမြို့ ဆိုပေါ့က ကမ်းခြေဆီ လူတွေ စုပြုံရောက်လာပြီး ပူနွေးတဲ့ ရာသီဥတုကို ခံစားခဲ့ကြပါတယ်။

ပိုလန်ဟာ ဥရောပမှာ အပူဆုံးနိုင်ငံဖြစ်လာစေမယ့် ပင်မလေပူစီးကြောင်းဟာ နိုင်ငံအပေါ် အခြေချမယ်လို့ ပိုလန်ရဲ့ အကြီးဆုံး အွန်လိုင်းသတင်းဌာန Onet.pl က ပြောပါတယ်။

ဧပြီလအတွက် ပုံမှန်မဟုတ်တဲ့ အပူချိန် မြင့်မားမှုဟာ လူအများကို အံ့အားသင့်စေခဲ့တာပါ။

မြေထဲပင်လယ်က ပုံမှန်ထက် ၁ ဒသမ ၂ ဒီဂရီ ဆဲလ်စီးယပ်စ် ပိုပူခဲ့ပြီး ဥရောပ တတိုက်လုံးကတော့ ပျမ်းမျှအပူချိန်ထက် သုည ဒသမ ၇ ဒီဂရီ ဆဲလ်စီးယပ်စ် ပိုပူနေတယ်လို့ ကမ္ဘာ့ရာသီဥတုအဖွဲ့ကြီး (WMO) က ဧပြီ ၁၅ ရက်မှာ ကြေညာချက် ထုတ်ပြန်ခဲ့ပါတယ်။

ပိုလန် အလယ်ပိုင်းနဲ့ တောင်ပိုင်းမြို့ ၄ မြို့မှာ အပူချိန်က ၄၀ ဒီဂရီ ဆဲလ်စီးယပ်စ်ထိ မြင့်တက်ခဲ့ပါတယ်။

“ကျနော်တို့ဒေသမှာ တခါတရံ ဧပြီလမှာ နှင်းတွေကျနိုင်ပြီး ဒီနေ့က နွေရာသီအပြည့်ဖြစ်တယ် ဆိုတဲ့အကြောင်း ဒီနေ့ပြောနေကြပါတယ်” လို့ ဒေသခံတယောက်က ပြောပါတယ်။

လူအများအပြားက သာယာတဲ့ အခြေအနေတွေကို ခံစားခဲ့ကြပေမဲ့ တချို့က ဧပြီလမှာ ပူနွေးတဲ့ အပူချိန်နဲ့ပတ်သက်ပြီး စိုးရိမ်ပူပန်ခဲ့ကြပါတယ်။

“ရေရှည်အမြင်မှာ (ကမ္ဘာကြီးပူနွေးလာမှု) အတွက် နောင်လာနောက်သားတွေ ဘယ်လို ရင်ဆိုင်ရမလဲဆိုတာ စိုးရိမ်ပါတယ်” လို့ ဒေသခံ နောက်တယောက်က ပြောခဲ့ပါတယ်။

Source : Reuters