မကွေးတိုင်း၊ ရေစကြိုမြို့ပေါ်က စစ်ကောင်စီတပ်သား ၁ ယောက် လက်နက်ခဲယမ်းတွေနဲ့ အလင်းဝင်ရောက်လာခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။
အလင်းဝင်ဖို့ ဆက်သွယ်လာတဲ့ ရဲတပ်သားကို ရေစကြို ပကဖ ရဲဘော်တွေက ဧပြီ ၆ ရက်နေ့ ည ၇ နာရီအချိန်မှာ ရေစကြိုမြို့ပေါ်ကနေ ဘေးကင်းကင်းနဲ့ ခေါ်ထုတ်လာနိုင်ခဲ့တယ်လို့ သိရပါတယ်။
အလင်းဝင်လာတဲ့ ရဲတပ်သားဟာ ရေစကြို ခလရ ၂၅၂ တပ်ကနေ ရေစကြိုမြို့ပေါ်မှာ တာဝန်ကျနေတဲ့ တပ်သား စိုင်းခမ်းလီဆိုသူဖြစ်ပြီး သူနဲ့အတူ MA 1 သေနတ် ၁ လက်၊ ကျည်ဆံအတောင့် ၁၃၀၊ ကျည်ဘောက် ၄ ခုနဲ့ အီနာဂါဗုံး ၁ လုံးပါရှိခဲ့တယ်လို့ သိရပါတယ်။
ရေစကြိုပကဖ တာဝန်ရှိသူက “အလင်းဝင်ဖို့ ဖုန်းဆက်ပြီး ဆက်သွယ်လာတဲ့အချိန်မှာ ကျနော်တို့ ဘေးကင်းစွာနဲ့ ခေါ်ထုတ်လာနိုင်ခဲ့ပါတယ်၊ ရေစကြိုမြို့ပေါ်က စကစတပ်သားတွေလည်း မတရားတဲ့ အမိန့်အောက်မှာ စစ်ကောင်စီလက်အောက်မှာ အလုပ်မလုပ်ကြပါနဲ့။ အလင်းဝင်ချင်ရင်လည်း ကျနော်တို့ ဖေ့စ်ဘွတ်စာမျက်နှာကနေ လုံခြုံစိတ်ချစွာဆက်သွယ်လို့ရပါတယ်” လို့ ပြောပါတယ်။
အလင်းဝင်လာတဲ့ စစ်ကောင်စီတပ်သားကို ငွေကျပ်သိန်း ၅၀ ချီးမြှင့်ပြီး လွတ်မြောက်နယ်မြေကို ပို့ဆောင်ပေးခဲ့တယ်လို့ သိရပါတယ်။
