စစ်ကိုင်းတိုင်း၊ တန့်ဆည်မြို့နယ်ရှိ ကံထူးမကျေးရွာရဲစခန်းကို မတ် ၄ ရက်နေ့မှာ အပြီးသတ် သိမ်းပိုက်လိုက်ပြီ ဖြစ်ကြောင်း အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက ထုတ်ပြန်ပါတယ်။

ရဲတပ်ရင်း ၁၆၊ ခမရ-၃၁၆ နဲ့ ပျူစောထီးတွေ အထိုင်ချထားတဲ့ ကံထူးမရွာရဲစခန်းကို ဖေဖော်ဝါရီ ၂၁ ရက်ကတည်းက ပြည်သူ့ကာကွယ်ရေးတပ်ဖွဲ့ (PDF) ပူးပေါင်းတပ်ဖွဲ့တွေက ထိုးစစ်ဆင် တိုက်ခိုက်ခဲ့တာ ဖြစ်ပါတယ်။

မတ် ၄ ရက်နေ့ မနက်မှာ စစ်ကောင်စီတပ်သားတွေ စခန်းစွန့်ခွာသွားတဲ့အတွက် ကံထူးမရဲစခန်းကို သိမ်းပိုက်လိုက်ပြီး လက်နက်ခဲယမ်း၊ ငွေကျပ် ၃၈ သိန်းနဲ့ မော်တော်ယာဉ်တွေပါ ရရှိခဲ့တယ်လို့ NUG ရဲ့ ထုတ်ပြန်ချက်မှာ ပါရှိပါတယ်။

တန့်ဆည်ဒေသခံတဦးက “(--)တွေ စွန့်သွားပါပြီ။ အသက်တွေ၊ ဘဝတွေ၊ အိုးအိမ်တွေ အများကြီး ပေးဆပ်လိုက်ရပါတယ်။ (--)တွေ မီးရှို့လိုက်တာ အဲဒီရပ်ကွက်တခုလုံးနီးပါး ပြာကျသွားပြီ။ ရဲစခန်းရော မီးကူးလို့ ကုန်ပြီ။ ရွာသားတွေကတော့ ပြန်လာနေကြပြီ။ လေယဥ်ကြောက်လို့ နည်းနည်းပဲရှိသေးတယ်” လို့ ပြောပါတယ်။

ကံထူးမတိုက်ပွဲအတွင်းမှာ စစ်ကောင်စီတပ်သား ၁၈ ဦး သေဆုံးခဲ့ပြီး ပြည်သူ့ကာကွယ်ရေး ရဲဘော် ၂ ဦး ကျဆုံးခဲ့ပါတယ်။

ဖေဖော်ဝါရီ ၁၉ ရက်ကစပြီး တန့်ဆန်မြို့နယ် ကံထူးမရဲစခန်းကို ကာကွယ်ရေးတပ်ဖွဲ့တွေက ဝင်ရောက်တိုက်ခိုက်တဲ့အတွက် စစ်ကောင်စီတပ် ဘီလူးစစ်ကြောင်းနဲ့ ကန့်ဘလူမြို့နယ်ထဲက ဦးဝါသဝ ပျူစောထီးစစ်ကြောင်းက စစ်ကူပေးဖို့ တန့်ဆည်မြို့နယ်ထဲကို ဝင်ရောက်လာခဲ့ပြီးနောက် အရပ်သား ၁၁ ဦးကို အပိုင်းပိုင်းခုတ် သတ်ဖြတ်ခဲ့ပါတယ်။