ဧရာဝတီတိုင်း၊ ကြံခင်းမြို့နယ်မှာ ဒီနေ့ ဧပြီ ၂၇ ရက် ဧရာဝတီမြစ်ထဲရေဆင်းကူရင်း လူငယ် ၄ ယောက် ရေနစ်သေဆုံးခဲ့ပြီး မွန်ပြည်နယ်၊ ရေးမြို့နယ်နဲ့ မော်လမြိုင်မြို့မှာ တရက်အတွင်း လူသတ်မှု ၂ ခု ဖြစ်ခဲ့ပါတယ်။
ကြံခင်းမြို့နယ်ဦ အကောက်တောင်တဖက်ကမ်း၊ သောကြာဒူးကျေးရွာအနီးက ဧရာဝတီမြစ်စပ် ဒေသ(အခေါ်) သောကြာဒူးကမ်းခြေမှာ ဒီနေ့ ဧပြီ ၂၇ ရက် မနက် ၈ နာရီဝန်းကျင်က လူငယ် ၅ ယောက် ရေဆင်းချိုးရင် ၄ ယောက်ရေနစ် သေဆုံးသွားတယ်လို့ ဒေသခံတွေဆီက သိရပါတယ်။
အသက် ၁၅ နှစ်အရွယ် မောင်လင်းလက်သာနဲ့ မောင်သော်ဇေယျာထွန်း၊ အသက် ၁၇ နှစ်အရွယ် မောင်သွင်ညီညီဇော်နဲ့ မောင်ဟိန်းစည်သူစိုးတို့ ၄ ယောက်ရေနစ်သေဆုံးခဲ့ပြီး မောင်မင်းခန့်ဆိုတဲ့ လူငယ် ၁ ယောက်ပဲ အသက်ရှင်ခဲ့တယ်လို့ ဆိုပါတယ်။
သူတို့ဟာ ကြံခင်းမြို့နယ်ကမဟုတ်ဘဲ မြန်အောင်မြို့နယ်၊ အင်ပင်မြို့မှာနေထိုင်သူတွေဖြစ်တယ် လို့ ဒေသခံတွေက ဆိုပါတယ်။
အုပ်ချုပ်ရေးအဖွဲ့နဲ့ နီးစပ်သူ ဒေသခံတယောက်က “မောင်လင်းလက်သာနဲ့ မောင်သော်ဇေယျာထွန်းက အင်ပင်မြို့၊ ကြံခင်းလမ်း၊ အမှတ် ၁ ရပ်ကွက်မှာ နေထိုင်တယ်လို့သိရတယ်။ မောင်သွင်ညီညီဇော်နဲ့ မောင်ဟိန်းစည်သူစိုးက အင်ပင်မြို့၊ ကြံခင်းလမ်း၊ အမှတ် ၄ ရပ်ကွက်မှာနေတာ။ အခု ကလေးတွေရေနစ်တဲ့ နေရာက သင်္ကြန်တွင်းက ရေကစားဖို့ သက်ဆိုင်ရာက ဖွင့်ထားတဲ့နေရာပါ။ ဒါကို ကလေးတွေက ရေကစားရင်း ရေနစ်တဲ့ဘက်ရောက်သွားပြီး နစ်သွားတဲ့အခြေအနေပါ။ လက်ရှိ ကလေးတွေရဲ့အလောင်းတွေ အကုန်ဆယ်လို့ရပြီး သက်ဆိုင်ရာက လာစစ်ဆေးတာတွေ လုပ်နေတယ်” အုပ်ချုပ် ရေး အဖွဲ့နဲ့ နီးစပ်သူ ၁ ယောက်ကပြောပါတယ်။
ရေနစ်သေဆုံးတဲ့ ဖြစ်စဉ်ကို စစ်ကောင်စီ ရဲတပ်ဖွဲ့ဝင်တွေနဲ့ အုပ်ချူပ်ရေးမှူးတွေက လာစစ်ဆေးခဲ့ပြီး လူငယ် ၄ ယောက်ရဲ့ အလောင်းတွေကို ကြံခင်းမြို့၊ ဆိပ်သာတိုက်နယ် ဆေးရုံမှာ စစ်ဆေးနေပြီး အင်ပင်မြို့ကို ပြန်လည်သယ်ယူဖို့ လုပ်နေတယ်လို့ဆိုပါတယ်။
မွန်ပြည်နယ်၊ ရေးမြို့နယ်၊ လမိုင်းမြို့၊ ကော့ဒွတ်ရွာက အသက် ၆၀ အရွယ် ဦးဖေအောင်ဟာ ဧပြီ ၂၆ ရက်နေ့ ညနေ ၆ နာရီခွဲလောက်မှာ သူ့ရဲ့ခြံတွင်းနေရာမှာ ဆိုင်ကယ်လုယက်ခံရပြီး လူပါအသတ်ခံရတယ်လို့ ဒေသခံတွေဆီကနေ သိရပါတယ်။
ဒေသခံတယောက်က “လူကိုသတ်သွားတာ။ မနေ့ညနေလောက်က သူ့ခြံမှာရှိနေတုန်း ဆိုင်ကယ်လုသွားတယ်။ လူကိုလည်လှီးပြီး သတ်ဖြတ်သွားတာပါ။ သွေးထွက်လွန်ပြီး နေအိမ်ရောက်မှ သေဆုံးခဲ့တယ်” လို့ ပြောပါတယ်။
ဦးဖေအောင်ဟာ အေးအေးဆေးဆေးနေတတ်သူယောက်ဖြစ်ပြီး ဆိုင်ကယ်ယူ သတ်ဖြတ် သွားသူကိုတော့ မဖမ်းဆီးနိုင်သေးဘူးလို့လည်း ဒေသခံတွေက ပြောပါတယ်။
ဧပြီ ၂၆ ရက်နေ့ မနက် ၇ နာရီလောက်ကလည်း မော်လမြိုင်မြို့၊ စမ်းကြီးရပ်ကွက်က လူငယ်သင်တန်းကျောင်း စာကြည်ခန်းထဲမှာ အသက် ၅၃ နှစ်အရွယ် ဒေါ်စန္ဒာဝင်းကို လည်ပင်းမှာ အရိုးအသွား ၈ လက်မလောက်ရှိတဲ့ ကော်ရိုးဘက်ကိုင်တပ် ကတ်ကြေးစိုက်လျက် အနေအထားနဲ့ သေဆုံးနေတာ တွေ့ရတယ်လို့ စစ်ကောင်စီရဲ့လုံခြုံရေးတပ်ဖွဲ့ဝင်တွေနဲ့ နီးစပ်တဲ့သူတွေဆီကနေ သိရပါတယ်။
မွန်ပြည်နယ်ထဲမှာ စစ်အာဏာသိမ်းပြီးနောက်ပိုင်း ခိုးဆိုးလုယက်လူသတ်မှုတွေ ပိုဖြစ်ပွားလာပြီး တရားခံတွေကိုတော့ ဖမ်းဆီးနိုင်ခြင်း မရှိပါဘူး။
ဓာတ်ပုံ - ညီညီထက်နောက် (အင်ပင်) ဖေ့စ်ဘွတ်ခ်
